07.10.2003(火) / 天陰

第三天

在酒店早餐完畢， 09:30乘阪急電車從梅田往池田。池田有咩野睇？事緣在出發當天，在登機前幾分鐘，忽然想起唔知網站定係報紙介紹，又抑或係自己之前睇過一d網頁，大概係講日清即食麵的展館。於是在短短幾分鐘臨登機的時間，走埋部免費電腦度，為無事先行程編排的旅程找點資料。稍為搵到個網址，就係時間登機喇。再詳細一點的資料，都係要去到日本再搵一搵。

從梅田到池田約22分鐘車程(乘車料@260yen)，一出站見到d地圖看板，出事喇！已經就住唔係月曜日黎架喇(點解用"就住"黎形容，因為好多咩咩物物展館都選擇月曜日，即係星期一休息)，點知，佢係火曜日休息！唉~~不過反正黎到，行個圈先去下一個目的地寶塚喇！

係車站拎到張地圖，係池田市的散策，但眼見所講的景點，吳服神社、八阪神社、池田城跡公園都唔係咁有興趣，於是決定就算休館，都去行個圈搵定路，下次再來行快兩步。繞了個圈加上問一下人，卒之到達休館中的即食麵發明紀念館門外，恆例拍個相先，走人！

回到池田車站，繼續乘坐阪急電車到寶塚(乘車料@180yen)，普通車約30分鐘車程到達寶塚。通過花之道，上一次到寶塚後現在已經休左業的寶塚遊園地原址，已經起了大樓。再前往無遠就見到個圓柱圓頂的手塚治虫紀念館，而館外的火之鳥像依然存在。付過位位500yen的入場料，進場參觀。上次來時，剛有關於咸蛋超人的小型展覽，今次正過了小飛俠誕生日不久(這個在上世紀60年代推出的小飛俠的設定，小飛俠是在當時的未來，2003年4月7日誕生)，加上為左紀念，有新的小飛俠TV動畫推出，於是順理成章有個新的小飛俠動畫展(即係而家叫的阿童木)。

睇過手塚大師的生平、作品，梗睇埋1階的影院的動畫，今次片目係「Osamu與Musashi」，20分鐘鐘片長簡單易明。之後再上2階睇展覽、玩下電腦game仲係賣店買返點手信，再參觀埋地下的教室就離開。

14:31乘JR寶塚線、環狀線至到達弁天町。何解要到弁天町，一來為轉車，二來又係為左轉車，不過第二個轉車係事關上一次黎大阪時，匆忙在弁天町轉車到大阪港，就係度發現左有交通科學博物館。所以今次特來參觀一下。15:10進入交通科學博物館(入場料@400yen)。由於之前已去過2次上野的交通博物館，所以今次入館參觀覺得不算得別，或者只是地方大一點，實物大的陳設品較多。約16:20離開，第一次事係去醫肚，而家都未食晏仔嘛！

在弁天町車站旁的麥當當攪掂後，乘地鐵中央線至大阪港。約17:30參觀海遊館(入場料@2,000yen)，一睇就兩小時，不過今次館內中央的大魚缸唔再係好大果條鯨鯊，只剩上次參觀時細果條(不過都大條左)，但都不損參觀的樂趣。睇住個錶，19:30，不得了，要閃喇，唔係隔離天保山d舖頭收哂工都似！

離開海遊館，即過隔離天保山MarketPlace行個圈。不過行得唔耐，一間又一間舖頭已經收工，唯有走人喇。再次回到地鐵中央線，一直坐車到難波。去到難波，想起噚日功虧一簣，早左一日去到難波Parks，今日新開張，一於去八一下。

去到人頭湧湧，新x坑的確香d呀o下！在難波City就有通道連結，入到平台，一邊係一個梯階形的花園，種左好多植物，一級一級咁上，於是跟住人行上去。這邊燈光比較暗，查實都無咩好睇，只係一邊向上行，睇到前面d雙腳同個pat多過睇d植物。上到最頂，望返落去，又幾好風景喎！另一邊仲遠遠望到通天閤添。

在花園這邊的最高處，望到難波Parks那個設在頂層的平圓型投影，好正喎！一時播下d花花草草，一時又播下廣告宣傳川，好得！

睇返手上個難波Parks floor guide，名店、食店都唔少，但第一日開張，都係唔同人逼喇。一筆過搭lift返平台走人算數。

走回難波車站附近，見到有間叫丼丼亭，入去食埋個晚飯，21:40乘地下鐵御堂筋線回梅田返酒店。

早餐：於酒店內

午餐：弁天町麥當奴(魚柳包餐：魚柳包、麥樂雞和可樂+燒雞包餐：燒雞包、薯條和可樂)

晚餐：難波丼丼亭(天婦羅定食麵附+炸豬扒定食跟麵)

大阪第一酒店2606室 (第三夜)

池田市觀光協會

即食麵發明紀念館

手塚治虫紀念館

交通科學博物館

海遊館

天保山