夜行列車利尻號

因為旅館的早餐講好了準08:00開餐,於是07:25就起身。下1階食了個不太o岩食的早餐,就回房取行李,09:00就已經回到稚內車站lock行李。稚內遊覽開始,第一站先到稚內公園Ropeway,呢度係1999年第一次單人到最北之地稚內唯一飲恨而無去到的地方。乘上幾短程的纜車(@180yen),好快就去到稚內公園站,小山丘上的就係大霧籠罩的百年紀念塔。在霧中向上坡道行,經過風力發電塔,就到達寒氣攻心的百年紀念塔入口(因為霧大風大,6月都好寒下)。付過入場料金(@400yen),突然有個紀念塔社員室有個人走出來,嘰哩咕嚕一番,大意只知話而家上面好大霧,又唔知點點點咁。跟住進入了1、2階的展廳參觀,出來後看完賣店,再想一想,點解有塔無人上去o既?坐在自販機旁的長椅想了想,原來入口對正中的一個凹位有部電梯,就係佢可以上到上面的觀景台。到達觀景台,從後而來的濃霧,令位處後方的利尻島沒在霧中,只能望到霧被風不斷吹過塔這邊來。而正面所望到整個稚內市和港口,但在已被吹散的薄霧中,也顯得比較朦朧。參觀完畢,再次雙腳著地,沿下坡道走到另一邊,就到達冰雪之門。和幾架旅遊車送來的伯伯嬸嬸爭位影完相,就再沿下坡道而下,就到達北見神社,查實就係剛才登山的Ropeway站隔離。

到神社外的巴士站,乘巴士到野寒布岬。昨日大雨連綿,就算身處姬沼,都未能一窺利尻富士全貌,但今日係野寒布岬,就能離遠睇見。觀光、拍照完畢,回到旁邊的水族館。5年前參觀這個水族館(入場料@400yen),平平無奇,只在出口處有一個水箱養了條電鰻,當放電時,裝置了的幾個燈泡會亮著,電力越高,越多燈泡會亮起。今次再重臨舊地,電鰻尤在,但仲係唔係果條,不清楚了。不過,今次參觀,就第一次見到久聞的流冰天使,有兩缸放了在近入口處,一缸是較大條的,另一缸都是小魚。可惜很難拍照,只好用拍片模式將難得的機會保存下來。參觀過後,再乘巴士回到稚內的巴士總站。先買下13:45出發到宗谷岬的巴士券,就趁空檔步行至防波堤拍個日間照片。準時回到巴士總站登車,望著左面的海和右邊的山丘,不久二人都訓著左。好在坐在後排的幾個伯伯醒水,知我地呢兩名遊客都係去宗谷岬,唔會去到大岬終站落車咁另類架,於是在快到宗谷岬巴士站前,就醒目拍醒左我,還一輪日文(係老一輩同埋唔係常聽的關東口音),只知大意快到站喇,呢,果邊有地方食野架咁,就係時候朦朦鬆鬆咁落車了。

落車第一件事都係先去最北端的紀念碑拍個照,之後才去搵野食。又係一次再次,就係再次幫襯斜路上賣店2階的Misaki食堂。食完又依舊路登上宗谷丘陵地,參觀過平和記錄鐘等等,就登上丘陵地最高點,外部裝有大風車的餐廳兼賣店。途中剛好是宗谷牛放牧時間,又正好是利用近車路這一邊的草坡地,有幸睇到隻隻都矜貴的宗谷黑牛,掂呀!不過身穿紅色風褸,一邊行一邊都唔敢行得太近,好在發現了那些圍欄是有電的,牛不敢行近,我即刻行得輕鬆返。到達食堂食左個牛乳Ice(@500yen),再食多幾口涼風,就回程到宗谷岬巴士站,途中第一次見到北海道的狐狸,雖然唔大隻,但總算第一次見到,幾驚喜。之後逛過一列各自聲稱最北之店的賣店,買過手信,就回到巴士候車室睇下前人的留言,17:38乘上回程巴士回到稚內市。先在中央Arcade街逛了一圈,食過晚飯,再繞到北之防波堤拍個晚間照,就前往便利店入貨,準備再次登上夜行列車利尻號。在便利店外先打個電話給美馬牛的Kumasan確認明天入住和要求早上直接參加Car Tour(其實只有電話錄音),就回到車站取行李,22:00登上利尻號離開稚內往札幌。


 

下一頁回上頁

早餐:於旅館內
午餐:宗谷岬Misaki食堂(蝦天丼+燒肉飯)
小吃:牛乳Ice x2
晚餐:稚內市車屋源氏(天婦羅定食+炸豬扒定食)