 |
|
|
2005年5月18日(水曜日) 天氣：陰，中午開始有雨，晚上青森勁大雨 行程：盛岡->青森->弘前(弘前公園、津輕藩Nebuta村等)->青森 住宿：Hotel New青森館208號房(第一夜) 膳食：
晚餐/青森魚民 - 燒雞翼、鐵鍋餃子、蒸雞炒飯、豚平燒、雞軟骨、炸豆腐、豚肉蛋薄燒及烏龍茶x2 = 3,435yen
飯後/鮮奶及草莓Ore = 231yen
JR Pass消費：8,310yen(以個人計) 盛岡->青森@6,010yen (東北新幹線) 青森->弘前@1,150yen (奧羽線) 弘前->青森@1,150yen (奧羽線) 累積：49,440.00/45,100.00(14日JR Pass費用) 住宿消費：Hotel New 青森館@16,100yen (第一晚) 本日之印： JR弘前站x1、JR弘前站觀光案內所x5、弘前昇天教會x1、舊東奧義塾外人教師館x1、舊弘前市立圖書館x2、弘前城x2、山車展示館x6、JR青森站x1
特典片段： 津輕藩Nebuta村館內Nebuta示範 津輕藩Nebuta村館內三味線示範
|
  |
| 經過考慮，決定再向北推進，否決改為南下避寒避雨。早上食完個無料早餐，就乘車經八戶抵達青森。今日入住的係離車站2分鐘的Hotel New青森館。去到checkin，認真好招待，邊做登記邊有人遞茶請坐，亦會盡量用英交溝通，雖則無咩兩句，都係誠意夠分。 | |
  |
|
| 放低行李一身輕，先去搵個晏仔食先！繞了餉圈，原來近在酒店隔離有個名為"新鮮市場"的 大樓，樓上係圖書館、地面幾層係百貨，地庫有個街市式市場，魚貝產品、乾貨同埋餐廳、食堂一應俱存。落去逛個圈打算搵野食，點知無咩心水，但d一大pat的鮟鱇魚同埋支解左都大大條的章魚腳，真係大開眼界。回到地面，斜對面馬路有間名為朝市壽司o既，反正今次旅程到而家都未食過一餐壽司，就佢喇！ | |
  |
|
| 入到去朝市壽司，客仔唔多，被帶到一個榻榻米座席，唯有盤住腿黎食。阿老闆娘推介是日午餐，一式三款， 係老闆娘極力推介下，卒之選了個A餐，成2625yen，三款至貴果一款。為保障計，另一份點了壽司，穩穩陣陣計嘛！無耐枱上已經放上A餐同壽司，果然，介紹得真係好野，尤其A餐個魚湯認真入味。刺身蓋飯d刺身都好正，壽司亦不錯，抵呀，抵比呀呢餐全程最貴o既午餐，不過因為趕車的關係，呢餐飯食得唔耐 ，半個鐘唔使攪掂哂！再次回到青森車站，坐上12:37的特急Tsugaru 5號去弘前，30分車程到達。去到真係估唔到，個站好靚仔，同青森站比較，青森站簡直係一個荒山車站咁添。好新式的車站，隔離就係百貨，下扶手電梯後就有間好多蘋果裝飾的觀光案內所。觀光案內所內，除了去年係富良野車站的見過好多人外，呢度係第二個勁多人的觀光案內所。入面仲有好多個印仔吸添。 | |
  |
|
| 吸完d印仔後，就睇住市街地圖行出車站，另站前通道直行，再右轉到達一條商店街，唔使幾耐就到達一d景點。不過，果d景點查實好細，而家有d入內要預約，又或要除鞋先入得，所以都係走馬看花。例如弘前昇天教會就係第一站，都係睇下個外觀，影個相，仲有係佢門前有個小箱，可以蓋個印咁。反而係到達佢門前的街角，有個市民中心，有畫展，有求職中心(可以上網)，又有土產賣，又有cafe，小歇一下都唔錯。望完一眼教會後，再回到櫻大通的商店街的路上，雖然唔係間間舖都有營業，但行下望下，好快就會到達弘前公園o既喇。而係路上有間叫三照堂印店，係門外有個第一次見到咁大o既印，絕對唔係印仔，係印老豆，講真大個我個頭。印呢個印老豆係唔使錢，仲有d大大張紙係度比你印，不過要印得好都幾考功夫架。印共有2個，仲有埋橡根係度，認真貼心，抵"印"喇！ | |
  |
|
| 去到弘前公園前，第一件事唔係入公園，要急轉彎，睇下側邊d景點先。就係裁判所隔離，就有舊東奧義塾外人教師館(不過，當日即改裝休業中)、山車長示館、弘前市立觀光館、舊弘前市立圖書館咁，仲有個好好view望去仲有一片白雪的岩木山。選擇性地行過山車展示館和舊市立圖書館(兩間都係無料入場，仲有印仔吸)。外面正下著雨，不過係咁情況下，當然都係"雨天決行"喇！ | |
  |
|
| 從追手門進入弘前城公園，沿路仲有不少殘櫻，仲有照外觀睇，如果正櫻花盛開，個感覺必定很好。行幾行就又撞到一大班見學的學生，於是拖展快放同慢溜等招式，盡量同佢地拉開距離，以免呢d小朋友嘈嘈閉，影響左遊公園的心情。行到公園中間，就係弘前城的本丸，天守閣成了史料館，但盛惠入園料@300yen。入到去又係有又高又直的樓梯，但得三層的天守閣，好快就行完，加上閃避班學生，真係快到不得了就完。最後步行至另一邊的龜甲門離開弘前城公園。 | |
  |
|
| 從龜甲門離開，好快就可以到達津輕藩的Nebuta館。在進入主菜的Nebuta館前，有間幾大下的土產館同埋煎餅店，後面仲有間賣JA米店添。付過@500yen的入場費，轉個彎就係間唔係好大的展館，入面正好係弘前Nebuta示範，有一大班學生同埋老師係度，係咁環境，無輪快放慢溜都無用，於是邊睇邊行。聽主持人講左一輪，終於到找人出去玩，學下打鼓，而工作人員就用條繩去拉個弘前Nebuta轉來轉去。睇左陣，行過兩層的展示廳，趁班學生仲係度玩緊，就走去另一邊的展館。途中有小型的Nebuta製作(要預約)，一大班學生正係入面學緊；另一邊有幾個上班族外貌的大叔(斷估都係蛇王果隻)，係度聽三味線示範；再轉一邊就係好多邊做示範邊賣東西的檔位，有做木工又有編織，不過因為手作野，價錢好貴，於是同班學生哥一樣，都係好快行過哂，最後出到一個有鯉魚池的亭園。 | |
  |
|
| 由於剛好我地比班學生哥早左出到亭園又見d鯉魚幾肚餓咁，於是又自助咁買左d預先掛係池邊的魚糧玩下餵魚先。點知，痴線架佢地....簡直好似十年都無食過野咁(但又未餓死)，因為餵魚的位置前剛好有舊石頭係水下面，d糧跌正果個位，班餓鬼鯉魚竟然會狼到飛身上舊石山食糧，果時差不多八成以上魚身都係水面上架嘛！仲要加上唔只一條係咁，果情況簡直係駭人聽聞呀，邊有魚餓到咁架！卒之到班學生殺到黎魚池，佢地見到咁高興o既情況，都有幾個買左糧黎餵魚，情況先略為好轉。時候不早，都係回程，唔係幾難夾到回青森o既車，攪到要係車站hea到下一班車就唔好喇。 | |
  |
|
| 19:16分再次回到青森，外面下著大雨，在雨中試圖四圍行下搵地方食個晚餐先回酒店，點知四圍都無咩合心水的地方食野，最後回到酒店對面的魚民食晚飯。魚民同去和民果d一樣，每一樣食物都唔貴，200幾到300幾yen一款，仲有個味噌荀小吃，食到飽飽都係3千幾yen。食過晚飯，都只係9點幾，回到酒店，行李原來已經送到房中，房內設拖基本有齊，但一見部坐地空調就已心生不妙，果真，無冷氣！唔係無裝，而係到5月空調只提供暖氣，6月後先提供冷氣！再搵搵房內點上網，事關係走廊見到d air station，於是落返front desk問下，原來係用哂無線上網o既，簡單填張form仔登記，就可以借來一盒無線上網kit，好簡單咁插線，就上到網喇！不過，都係東橫方便d，有lan線係度一插就得，唔使駁來駁去嘛！ | |
|
預告：青森市內觀光 本日看圖識字版速報係由大雄於青森Hotel New青森館20x號房內用無線Lan接續寫成 完整速報版於2005年6月11日於香港完成 |
|
早餐/東橫Inn無料早餐
午餐/青森朝市壽司-午餐A(紫菜飯底刺身蓋面+魚湯+燒元貝一隻)+壽司(散叫：三文魚、章魚、蟹及元貝)
= 4,515yen
小吃/青森蘋果片
