前言

計落最少都有17年,最多22年囉喎!sorry喇,唔係講緊對上一次去澳門係幾時,係數緊今次澳門之旅的團友,最少識左幾多年。

話說在2005年國慶日假期一次中學同學的聚會,有人發起不如一齊外遊的建議。例如有建議到台灣去,星期六凌晨機去,星期日晚機返;又例如3至4日長假期去一次日本咁。不過兩個建議最後不獲通過,事關前者有幾個人係星期六都要返工,請假又蝕水 架喎!後者呢,大家都好有興趣架,不過去日本花費果一筆,哈哈..哈哈哈…咁澳門喇,近近地,花費又唔太多,拍板!(快到連日期都可以定訂埋,幾積極呀!)

雖然最後都係有個別人士因事未能參加(家下唔同讀書年代講到去玩梗係no.1先,年中約餐飯都要度過期,又何況係外遊呢?),而最終有5個同學另加上4個家眷共9人參與呢一次澳門之旅,包括阿輝、阿Yam、Joanne與阿華、Bonnie與阿Sam及小云,仲有貓骨和大雄。

行程

2005.11.26 (星期六)

信德中心的聖誕燈飾為左遷就 個別人士星期六要返工又或者有私事要處理的關係,集合時間係晚上19:00在上環信德中心。乘上19:30開出的Turbo Jet往澳門,途中雖有廣播話有垃圾纏住摩打令船程阻延的情況發生,不過船有船行,我有我訓覺,20:40大家安全到達澳門的外港碼頭。

澳門喇,沿海夜景一輪簡單的過關手續後,一行人立即分乘兩部的士到氹仔官也街食晚飯先(車費40蚊)。綜合左隨團出發的星島出版《下一站 澳門 珠海》和由阿輝從圖書館借來的《澳門遊遊蕩蕩》,選定了一間介紹話以水蟹粥馳名出名的食店。

21:15到達飯店,點了兩份水蟹粥、豉汁蒸大鱔、醬爆雞、椒鹽鮮魷、瑤柱生菜、豉椒花蛤同埋椒鹽海蝦。經過咁多位肚餓的食家品評後,瑤柱生菜…ok、水蟹粥及其他幾味…尚可,唯獨那個豉汁蒸大鱔無咩點郁過,夾過黎食o既,夾返黎果一舊都仲 可以係骨碟上出現。由於我唔食鱔,經訪問過食鱔的食家後,獲悉因為豉汁還豉汁味,鱔還鱔,所以得到個結果係…唔掂當!埋點700幾蚊,價錢尚可,但又點可以滿足到黎澳門為食野o既目的呢!

水蟹粥、瑤柱生菜、豉椒花蛤、椒鹽海蝦、醬爆雞、椒鹽鮮魷和豉汁蒸大鱔

駿景酒店門外飯後眾人決定先到酒店取房放下行李先再戰食壇。從官也街到今次入住的駿景酒店步行約只需10零分鐘,路經澳門奧林匹克綜合體戶外天地同埋一個迴旋處後,見到四面佛的隔離就係酒店所在。Checkin取了四間房(1807、1813、1815和1817號房)之後,分配好房間黎個短暫休息,23:00再次集合乘的士到議事亭前 繼續搵食。只需5分鐘車程(車費29蚊)就到達議事亭前地喇。

在附近繞了一圈,到了福隆新的甜杏園麥師傅甜品食糖水。我叫了凍紅豆湯丸(10蚊),而貓骨叫了芒果西米(13蚊),食評係湯丸剛好無存貨,所以係即叫即搓, 正宗新鮮滾熱辣,正!芒果西米就麻麻地。

左、紅豆沙加湯丸,右、芒果西米呢個廚房好多煲1010的漫遊飛左去澳門電訊

糖水都食埋,下個節目由阿華提出,就係去法老王娛樂場賭運氣。一連食左兩餐食得飽飽的聚人,選擇了行去法老王,經過葡京再轉個彎,再行呀行,00:30終於行到法老王。從商場扶手電梯上去,外觀又幾grand咁,不過入內就要先去櫃位登記拍個快照拎張會員咭先入得。而入場除了插咭證實身份,又要搜袋,對於賭博無興趣的幾位,又的確幾無癮。入場後,賭運氣的阿華與Joanne自行搵張發達枱下注,其餘的就逛個圈,又落樓下玩老虎機那層睇睇,點知一上又落又要check多轉,反正都眼訓,就留低賭運氣的一對,大家再次打的(車費都係29蚊)回酒店,01:10各自回房休息。

澳門夜景

2005.11.27 (星期日)

08:00起身,打開窗睇睇,窗外好近就係人家的住宅,下望就係一列列好似貨倉的建築物。而扭開電視睇睇,除了香港的幾個電視台外,仲有d好似係澳門的電視台節目睇。09:25,在相約的時間落去樓下的餐廳"柏麗閣"食酒店套餐包埋的早餐,好在早預左酒店都係食少少,留肚出街食,事關d早餐真係好削。

酒店房內外景,早餐食左多士、炒河、炒蛋和蘿蔔榚

大家哽完個早餐,就各自回房取行李,10:30大堂再度集合,準備checkout出發今日的食過不等行程。

左、酒店旁的四面佛,中、噴水池一個,右、官也街入口

離開酒店,沿噚晚的路線再次回到官也街。噚晚黎得夜,好多舖頭都收左,今朝就唔同哂樣喇。經過手信店"晃記",有人提意試試肉切酥。好在大家醒目,先買包試過口味如何先。唔...有點硬、有點咸、有點感覺似雞仔餅的做法...呢頭食完,果頭又走左去對面間車厘哥夫買鳥結糖、薑糖之類。例牌喇,阿事頭,我買左幾包,佢又幾包,有無平先?最後我買左包腰果鳥結糖和薑糖,當然,仲食左d試食的鳥結糖喇。再黎就到食莫義記,出名大菜榚。有人食三色大菜榚,木槺布丁咁,每款都係幾蚊,抵食。呢度食完,行到街尾打個右轉,好快又到豬扒包時間。去到大利來,剛好有張長枱坐得落九個人,坐低叫野食,點知豬扒包要下午先有,唯有叫幾份豬扒多食,順便叫佢切開兩份。不過塊豬扒得個小小三角包住(試問比堅尼又點可以包埋豬扒呢?),硬係食得唔過癮。食野順便飲埋野,大部份人都選了凍檸茶,諗住幫助下消化,點知杯野完全唔掂。

左一、晃記,左二、莫義記廚櫃,左三、木槺布丁,右一二、大利來+豬扒多

食飽過對面等巴士,準備離開氹仔回到澳門方面的松山。架巴士好似香港的小巴款(車費3個3),坐得唔多人,而佢亦繞了個圈,經過駿景酒店再兜兜轉轉才過橋。窗外景色模糊,雖則天氣雖好,但好大的煙霞。由於唔多識路,大家係巴士度討論點去松山時,有同車的阿姐提供旅遊情報,亦有另一位阿嬸搭多兩句,約半小時的車程,12:15大家順利係松山附近的巴士站下車。

巴士和充滿煙霞的澳門

松山

 

一直往斜路上行,經過東望洋酒店,依住往松山砲台和公園的指示牌上行,就會到達松山市政公園的入口,旁邊有個洗手間,大家可以先去輕鬆一下先。沿邊再上斜,就會到達目的地聖母雪地殿教堂和燈塔,而前行的話,就會行到去松山公園和二龍喉公園,那邊有遊樂場,有動物睇,仲有纜車站。

 

登高望遠,風景的確不同(仲帶點晒添)。聖母雪地殿很細,而且係只作參觀,入面有保安員看守,不過入面感覺良好。在旅遊詢問處拿了幾份旅遊資料,大家又準備往下一地點喇。

左、澳門一景,中、聖母雪地殿與燈塔,右、教堂入口的一盞燈

沿路下斜,約20分鐘後到達禮記雪榚,行到熱辣辣,梗係嘆一嘆先喇。大致上各人都點了份馳名三文治雪榚(價錢5個半),個包裝保留傳統,好正!而三文治包住三個味道的雪榚,有蜜瓜、雲呢那和芒果味,食感不比包裝正,但食下無喇。我就順道叫左個菠蘿冰(價錢8蚊)補補水先。另外見到有其他客人叫了雪榚磚食(半磅裝15蚊,一磅30蚊),睇落好似幾ok喎。

禮記雪榚

時間不早,已經係13:50,都休息左半個鐘,都要出發喇。一輪「又越過高山,又越過谷」,途經聖味基墳場,入面間教堂好靚下,大家都入去轉左個圈,陽光投射係教堂外的玻璃門再影入教堂內的牆上,影出多種顏色,好靚。之後見到鏡湖醫院,又轉多幾個彎,20分鐘行程後,終於到達大三巴。

聖味基墳場內的教堂

由於船票套票有優惠券,於是阿輝建議到澳門博物館(免入場費),不過其他人已去過,於是分成兩批人,阿輝、貓骨和我就參加澳門博物館行程,其餘的人就逛大三巴和附近的手信店,15:00再集合。

左一、哪吒廟,左二、澳門博物館,左三四、炮台公園外望,右、大三巴

由於要善用半小時左右的參觀時間,急急腳去到大三巴旁的博物館入口,貓骨和我每去到博物館都會睇好耐,但今次因為時間的關係,只好快看。入面除了一d靜態的陳設外,都有一d有聲有畫的陳設,下次有機會相信會再去睇睇,慢慢行。博物館上表炮台花園,可以望返去松山方面,見到剛才到過的聖母雪地殿和燈塔。時間到喇,再次快步到集點,就係大三巴前的咀香園前。

從大三巴到草堆街

當三人到達集合點,阿Yam已經買了一袋手信,其他人就話因為呢間咀香園無試食,唔買住。趁天氣好,搵人幫幫手,拍返幾張難得的大合照,以大三巴做背景,不過搵著位唔多識o既仁兄,人就影哂,但大三巴就無左頂果截。沿住人頭湧湧的路,兩旁除了有手信店,仲有傢俬店,途中仲有d好似女童軍咁係度賣旗,賣果d旗係公仔貼書,幾得意下,引得阿Sam走埋去做個善事(為左張貼紙),沿途仲有好多唔使行埋舖,行正路中間都有的免費試食杏仁餅仔同肉乾添。去到女媧廟一帶,見到有間舖頭仔叫"大聲公涼茶",我就買左枝菊花茶飲(15蚊一枝),都幾好飲。之後大家搵到路,諗住去一間舖頭食豆腐花,點知,星期日休息。白行一趟後,選擇了行返去議事亭前地那邊,去營地街街市食野。

左至右、營地街街市,牛雜、餃子、白粥淨腸、豬膶腸

初頭睇d旅遊書,以為街市係地踎檔,點知睇住地圖行,差在無GPS係身,點知目的地係一個現代化的街市綜合大樓,而果d書內面講的食檔,原來係3/F。兩列背對背排列的檔攤,一經過就好鬼熱情咁"隊"個餐牌比你拎埋位睇,方便你轉頭去order。座位方面係公家的,無話對住檔口果d位就係果一檔的。由於我地人多,坐左埋一個角落位,再由幾個專人(梗係男士去做,包括我)去買野食。轉左個圈,叫左牛雜(15蚊一碟)、餃子(5蚊6隻x2份)、牛肉腸(8蚊)、叉燒腸(8蚊)、淨腸(即係齋腸,6蚊),仲有豬膶腸(8蚊)。雖然大家到目前為止都無食過正餐,不過掃完成枱野都夠哂飽囉!

左至右、議事亭前地、福隆街、祥記麵家、鉅記杏仁餅、鉅記

離開街市綜合大樓已經係16:20,轉右就係人山人海的議事亭前地,今日剛好有保安同樂日,有警察、消防等等制服團體的單位遊戲,不過人太多,好逼,所以無停留。再次回到福隆街,呢邊人少好多。雖剛食飽,但阿華依然要完成佢o既安排,就係去祥記麵家整返個竹昇麵。大家都無佢咁好氣(Joanne除外,因為要跟住嘛),選了呢個時候去買手信。大部份手信都係祥記隔離的鉅記買,差不多每人都買了幾百蚊,一至兩大袋的手信,例如杏仁餅、盲公餅、蛋卷、肉乾、紅豆香蕉榚等等(除了阿輝選了買個老婆餅返香港比Stanley做手信)。趁阿華食完個竹昇麵轉而到佢買手信,大家轉為去隔離路口間咀香園睇睇。

左至右、阿輝,飲咩呀?、瑪嘉烈葡撻、葡撻和薯仔布丁、3號巴士

時間17:00,大家都買過手信,飽飽之餘都有點攰,決定提早回程。不過當大家諗住邊行邊散步消化下的同時諗到仲有瑪嘉烈葡撻未食,於是朝葡京方向行,再睇住地圖搵下返香港囉!係邊。行到17:45,終於搵到瑪嘉烈喇,就係橫街入面,但都好多人下。搵到幾張細細的枱,再自行拼埋一張大少少的枱,就買了一人一個葡撻(5個半一件)和幾件薯仔布丁(6蚊一件),再叫杯野飲(例如凍Mocha就15蚊一杯),d葡撻又真係幾好食下。因為大家都攰攰地,坐左幾個字,天都黑齊,都係走喇!本來大家都想坐的士,但兼任領隊阿輝堅持我地要坐巴士,於是係巴士坐等左陣,就上左架3號巴士(車費2個半),20分鐘車程就回到碼頭。由於手上船票係19:45,已經疲倦的大家決定試下睇下有無早幾班船返香港。點知個個閘口的排左條waiting list的人龍,最後大家閃入19:45那班船的閘口邊睇電視邊等到夠鐘上船。等了一個鐘,終於等到19:45的船返香港,全程24小時15分鐘的澳門之旅就完滿結束喇!

水蟹粥

豉汁蒸大鱔

醬爆雞

椒鹽鮮魷

瑤柱生菜

豉椒花蛤

椒鹽海蝦

凍紅豆湯丸

芒果西米

酒店早餐

肉切酥

鳥結糖

木槺布丁

豬扒多

凍檸茶

三文治雪榚

菠蘿冰

菊花茶

肉乾(試食)

杏仁餅仔(試食)

牛雜

餃子

牛肉腸

叉燒腸

淨腸

豬膶腸

葡撻

薯仔布丁

凍Mocha

大三巴合照(呢張小云影的,所以有全個大三巴睇下)