噚日為左去遠地方，就早起身，今日去近，就梗係訓得晏返些少。09:00落去食多埋餐早餐，半小時後食飽飽返房，先跟住第一日坐飛狗時阿聲大有禮姐姐比我的單張，打個有廣東話接聽的電話，call定回程車先。話咁易，廣東話對話，18:00酒店門口等就ok。10:05帶埋行李落樓checkout，順便寄存行李係酒店，留返黃昏返黎先拎。
　

輕裝出發，第一站國父紀念館，乘捷運到國父紀念館站下車(@NT16)，出到地面轉個彎就係中山公園，行多兩步就已經係紀念館的背面。係紀念館旁的公園通道上有幾個孫中山先生的像，各有姿勢。點知行到正門，竟然有告示牌話因維修空調，休館3天！真黑仔！不過咁好天氣，當散步當行街順便影下相囉！

係紀念館的範圍向外望，好容易就見到101大樓在不遠處，另外京華城亦在另一個方向出現。二者擇其一，就去行下101大樓先。由於眼見不遠，又試下行路去，15分鐘步程左右，約11:00就到達喇。
　

101大樓係呢個鐘數唔多人，行街的人斷估都係遊客多。商店方面，全部名店，感覺尤如樓底高左o既中環Landmark。上多幾層就到聞名而久的PAGE ONE。絕對可以用勁大間黎形容，各類書都好齊，繞個大圈坐下睇下，都花左唔少時間。行完PAGE ONE，未想食晏，於是拎住張floor guide睇睇，名店部份真係無咩興趣，於是落左最底層睇睇，有間Toyland賣玩具，都可以行下o既。

離開101大樓，利用天橋行到去相連的Warner Village、Neo 19，仲有對面的信義新天地等，但無甚興緻。最後回到市政府的大樓的台北探索館(入場無料)，就去睇睇先。遊覽方法要先乘電梯上幾層再逐層向下玩返落黎。第一層係台北城的模型，古代與現代的混合，另有台北的立體地形圖和一些相關歷史資料，樓下的層數就有d以影像與器械組合的玩意，介紹下台北市的人文地理，幾好玩的。

玩左成個鐘，要食晏仔喇。睇過旅遊書，有間叫度小月的在忠孝敦化，諗住去坐捷運由市政府站去好快，點知剩係由市政府大樓行去捷運站，都行成15分鐘先去到(跟住坐捷運都係4分鐘車之嘛！(@NT16))。
　

14:25終於去到度小月開餐，呢度據講係由清光緒年間已經開業，以賣擔仔麵而聞名。不過，呢間店呢，除了一入門口右側有set open的煮食架生好"街頭"之外，全店的風格都好新潮下。點了幾個菜，半個鐘就攪掂，埋單NT440。

擔仔麵@NT50 / 祖傳肉燥飯@NT30 / 黃金蝦捲@NT120 / 蚵仔酥@NT120 / 塩烤鮭魚下巴@NT120

補充完能源又係行街時間，回到捷運站打算去忠孝復興太平洋SOGO一帶行一下。點知在捷運站有一條名為東區地下街的通道，邊睇邊行，原來係連結到忠孝復興那邊。地下街的店舖唔算有咩特色，不過有野睇住黎行就好易行遠左都唔覺。在忠孝復興回到地面，先去左SOGO敦化新館借個方便，再潛回地下街到另一邊的頂好商圈逛一逛，最後回到太平洋SOGO。不過行到無咩癮，後門入SOGO，轉個頭已經係前門直出落返捷運站。

由於時間關係，仲有約不足兩個鐘逛街(或者應該講，仲要捱逛街多兩個鐘，因為腳仔開始軟喇！)
　

黎到最後選擇的時間，答案卒之選左去捷運台大醫院站。放心，唔係腳仔軟到入醫院，係取道台大醫院站到"凱達格林大道"往總統府。係比陽光"撐"到影咩相都背哂光的情況下，黎到總統府前，遠遠影個全景照。但行多兩步，已見有兩位阿太行近保安警戒線前拍照，好快就見到有憲兵行前查看，呢種咁嚴o既情境，始終我地香港人見唔慣，都係閃人為妙。

轉個彎，就已經係書店街的重慶南路，逛過幾間書店，中途搵間有得坐o既拎本書睇下兼作休息。由於無咩書想買，行完書店街竟然係空手而回。反而經過一間義美，打算買個蛋糕食下，係正常、NG款和頭、尾及邊科(即係d圍邊位置)三款不同價錢的蛋榚中選了盒頭、尾及邊科，只需要NT40就得，正常o既好似要NT60定係NT65先得。

行到新光三越，仲有成個鐘先夠鐘返酒店取行李等巴士，於是落左地庫food court買d野飲，順便抖一下。買了一杯木瓜鮮奶(@NT65)和一碗芋圓紅豆湯(@NT45)，由於後者想食凍o既，點知佢話無凍，但亦可以整個凍o既我食，方法係先放d冰落碗，再撞個紅豆湯落去。至於好唔好食，咪淡"搣搣"囉！
　

抖夠就起程回酒店，途經package酒店選擇中與天成同級的凱撒酒店。取回寄存的行李後就到酒店門外等車，幾分間後就有間小巴駕近，原來係要坐駁腳車去轉的，全小巴只得我地兩個人，中途不停站，絕對包車feel！係收工時間繁忙的街道上，記得經過了婚紗街，兜兜轉轉15分鐘車站黎到一個陌生的地點下車，前面就係兩架飛狗巴士。一落小巴，就有專人行埋黎賣飛(@NT135)，買完飛上到飛狗，不到5分鐘就開車，臨開車前司機叔叔問左有無人去第一航廈，有無人去第二航廈，跟住就開車。

夜晚離開台北市的車不多，沿途行車暢順，好快就訓著埋覺添。約40分鐘就到達第一航廈，咦，到囉喎！行行落車，拎行李喇！取過行李行入登機大堂，咦！出事喇，點解無港龍飛機o既！定一定神，原來落錯車呀，要去第二航廈至真呀！本來落車後仲朦朦鬆鬆，登時醒哂！仲有時間，21:00的航班，仲有時間！觀察四周，咦有巡迴巴士喎！睇睇時間，就開車喎！

係車上已見到一個大叔乘客，另有個伏係度o既大叔司機，後來又黎左個後生的地勤人員，但伏係度o既司機大叔依舊係伏係度。超哂時喇，此時司機大叔個手電響起，佢一邊聽電話一邊打開門比我地上車，於是車上四個乘客就係度等佢開車。點知條阿叔(唔好怪得老粗，當時o既情況佢絕對配得上呢個稱呼)係度起勢請電話，卒之幾分鐘後先前上車的大叔好似想打佢咁要求落車，而呢位講電話大過做野的大叔就邊開車門邊繼續佢o既電話。再過幾分鐘，阿叔繼續投入佢o既電話世界，當時我又唔知點"醒"鬼呢位不負責任的司機阿叔，於是就轉身向坐係後掛的地勤人員問一問條阿叔係咪咁就野架？係咪夠鐘要開車呢？點知仲攪鬼，個斯文地勤竟然理都唔理我，反而喝果條阿叔開車。呀，條阿叔又聽話開車喎，但沿途電話未離過手，3分鐘的車程，仲要一到站就佢自己第一個落車繼續講佢o既電話！真係自嘆見識少，咁o既人都有o既！
　

19:25去櫃位checkin過後，係登機大堂四圍逛下，有書店、有手信店，仲有無料電腦上網。之後去左樓上的Starbucks飲杯野再食少少，就去到中國商銀兌換返d台幣，個rate大概係4.36，換完仲剩NT4。去到閘口都只係20:15，閘口四周的商店比入閘前的又大又靚，仲有間號稱故宮博物館的，有d陳設和零售品似足入左故宮博物館咁。係登機口又有d電腦遊戲比遊客玩，時間好快就過去，20:55登上KA483班機，21:22才起飛，22:38就降落香港機場，台北之旅就此結束！