|
|
|
|
大雄的話 |
|
|
刊出日期：2003年6月25日
總算回復正常的日子，地鐵裡已沒幾多人帶著口罩，幾百蚊團費外遊有斷萬個報名人次一時間湧現，不知道早前為了健康而去認識香港的大眾市民，還會否在假日想下香港遊呢？ 失業人數上升，一來係經濟唔好，二來係多了班小朋友考完會考或者大學畢業，而家搵工真係難，每個甚麼招聘會都排長龍，連馬會都要減人工，但唔知點解仲好多人去買樓，咁究竟香港的經濟係好定唔好定係有人好有人唔好呢？我想，經濟理論真的難明(好在我當年無讀過經濟o者！) 今晚看新聞，有局長說議員無禮貌，唔答你問題呀！如果加埋"吹咩！"兩字係後面，我想呢個回應會更加傳神，更加明白咩叫發你脾氣，唔啋你咪唔啋！既然話唔啋就唔啋，咁班議員高官係立法會仲有咩可以做？四目交投，鬥坐到散會就做到野架喇？係我都想學下呀！ 說了一堆近日香港的事，唉~~都係一於懶理吧喇！反正董伯伯的護蔭仲有成四年咁長，勞氣都無用，一笑置之，我有我o既生活，你有你繼續你o既忙碌吧喇！ 各界呼籲71的遊行，各有訴求，但目的都係比董伯伯睇下有幾多唔妥你，咁大家唔知當日會唔會去遊行埋一份呢？我想當日做賣黑衫、賣水飲的小販，不啻係一個好好的商機啊！~ 大家諗諗喇！ 版頭加了個the Bees wardrobe的網店連結，那是網友的朋友開的，如有興趣，多多支持！(聲明：一切交易與nobitaworld.com無關架！) |
|
|
刊出日期：2003年6月15日
工作依舊的忙，「董伯伯」在公司依舊的過得一骨又一骨，完左一單又去煲大第二單，正所謂鑊鑊新鮮，無得救喇！ 最近又重燃「搵d野攪下」的諗頭，一來係工作一直只得個忙，咁都唔係辦法，一來年事日高，唔通真係退休先去諗？係呢個年代，無理由等到老細嫌你人工貴，仲抬埋d縮減開支收入少左理由先被炒魷或者減人工先去諗將來架？好多中年打工一族因為無咩專長，但又比人裁左員，卒之要去創「第二事業」(Second Career)，但普遍都係被"動"之後先自己去"動"，完全缺乏時間去籌劃。 今日有某位大佬在網站的語錄說公司減佢雙位數人工，好在佢仲係單身寡仔(出面，尤其係日本方面收埋幾多老婆仔女就唔知)，所以都無咁慘情，加上佢未使供樓，但如果又供樓又有老婆仔女，真係唔知點頂。 最近有老友兼同事因為老婆一句鍾意，卒之瞇一下眼之間，係浪漫的同時就賣左廿年身比人，買左青衣200呎泳池果個盤的一個六百幾呎單位。幫佢計一下，暫時性佢要用人工的五成半去供樓，仲未計管理費、差餉地租、水電煤上網手提....一家三口靠一份糧，真係唔知佢點頂。 所以呢，趁我仲係工作同收入上仲有點優勢(偏偏係時間除外)，都係要努力度一下有咩第二事業可圖先！大約七年前試過和朋友們籌劃做從日本入貨的玩具店，最後無疾而終；年多前飛去日本入貨，在網上賣點精品，卒之賣到今天，計落蝕左少少，但總算做了點東西，黎緊究竟有咩好攪作呢？而家話哂舖租平左，但可惜大家的消費意慾相對低左，又加上突然又會有單疫症出黎，雖則政府起勢叫人使多d錢，拎兩個半銀錢去買多個菠蘿包都好，可惜內部消費，最後邊會有好結果架！近幾年有了網站，久不久都收到一些網友的email，都係想做點事，但苦無經驗、又沒甚資本，夢想大家都有，咁呢d東風幾時先吹得起呢？ 最近，和好友何姓作家交談，佢有幸參觀了Figure大師Eric So的office，千四呎在佐敦，真係聽左我都好響往。仲有同office的另一人，就是今次由香港人做起的幾米的figure(台灣繪本家幾米，金城武和梁詠琪主演的「向左走向右走」遲下有得睇)。好，今次一於加多兩錢決心，一於TO DO SOMETHING BIG，大家又有咩好路數呢？ 說一點工作以外的東西吧！除了工作，都有點娛樂o既，例如今日一次睇哂積存了四星期未睇的三更急先鋒(明珠台逢星期五晚播放，這星期做到第三季尾五集。仲有睇左有線娛樂台的肥媽私房菜，除了肥媽教煮菜外，仲介紹一下d私房菜，今晚仲介紹左西貢那家由香港先生日本太太辨的懷石料理私房菜，真係睇到口水流。好在前兩天和網友們去とん吉了吃日式豬扒飯算係唔輸蝕喇！不過最大的樂趣呢，就係訓左十幾個鐘，仲包埋晏覺添！爽呀~~ |
|
|
刊出日期：2003年5月25日
以下給大家兩個例子，又看看大家看完後有何選擇？ 例子一： 最近覺得公司像個微縮版的香港，最弊在公司有三個董伯伯，一個係老細，讀得書多，但做事不知所謂，每天都很有幹勁地做事，皆因他力有不逮，唯有將勤補拙，可惜只懂拿著放大鏡做事，小事化大，卒之弄個大頭佛，最後若幸運地嬴了官司只懂拿著個判令四處跟人說「嬴了！嬴了！」，若結果正常輸了官司，只懂收收埋埋當無事發生；第二個係上司，有人辦事不力佢都有眼見，曾好理直氣壯說「這種人不可以姑息」，但最近又試過盡力去替辦事不力之人包庇，希望上大人不要知道出了事，卒之來個紙不能包火，可惜事過境遷後，不要說秋後算帳，就是賽後檢討都不要期望了；第三個是經驗老到的同事，說經驗年資，可以一抵二，可惜辦事能力和工作經驗，比一個入行三個月到半年的新仔差不多。如果你的公司有三個董伯伯，你們又會點做？辭工走人好過？為著生計繼續苟存？ 例子二： 如第三個董伯伯返工的日子，工作是做自己工作之餘只需兼顧多少和分配他的工作，但極之勞氣弄得整日粗口橫飛才能渡日；如第三個董伯伯放假的日子，工作是需要做自己工作之餘再做埋他的工作，卒之無八九十點都不能收工，但辛苦得來心平氣和，那你又會選在那種日子工作呢？ 唉，不過講太多都沒用，現實就是現實，總得去接受。現在我的標準答案嗎？期待積存的工作快點完成，騰出時間，策劃大計！努力！ 說回真實的香港，WHO將對香港的旅遊警告，弄得香港人開心到不得了，四出行街、食飯、郊遊、消費，但大家有沒有想清楚，那是針對外國人來香港的警告取消，不是香港再沒有疫情呢！所以大家不要過份放鬆，千祈、千祈，要記得洗手，適當時間要帶口罩，直到一日完全戰勝SARS才大肆慶祝都未遲架！ |
|
|
刊出日期：2003年5月8日
不知是慶幸定或不幸，工作在四月份一直很忙，甚麼準時收工雖則過去幾年來都已經少發生，但現在更加一星期有幾日是人家宵夜時我才收工去吃個晚飯。我打工架咋！如果我係老細，一日搏咁多個鐘，早應發達了，但....唉~~~ 日子難捱，有工做已叫好，希望大家都可以輕鬆一下，一個星期做五六十個鐘，的確好鬼幸苦架！而一連兩個月中有幾星期都有間著一兩天公眾假期，但之後六月起就每月都未必有一天公眾假，又要捱一餐了！ 這兩個大破財，上月用了幾年的「落機呀」手機畫面勿隱勿現，卒之要換機！先前天「索尼」牌用了五年老mon勿爾變了聲波顯示機，黑色的波紋由左向右極速擴散，逼不得已又破財換個時款LCD回來！如果買手機、換LCD都可以換機票就好了，我夠換幾張啊！~~ 航空公司大減班次，又要放員工無薪假，久而久之，一於回到一百年前我想大家要考慮坐船到日本囉！ 七月又是大減價月、又是看薰衣草時間，大家又準備好了沒有？但教育界的，今年暑假又唔知點放呢？ 而家每天都太多變數，前路艱難，一齊去行嗎？ 有空到http://operateunite.hkcss.org.hk/看看，We shall overcome..... |
|
|
刊出日期：2003年4月21日
這個假期裡，市區一般人流多左少少，但郊外地方就人流多多，行山、離島、澳門、BBQ、海灘，總之想得出屬於空氣清新，不易受病毒感染的地方，就有一大群人湧去。希望日後大家都多到郊外吸吸新鮮空氣，誠言，我過去半年去了行山，身子都好了一點。 SARS的情況依然未完全受控，但總算在受感染和康復出院的人數上，一個總算下降，一個就平穩上升，只是不幸過世的人數，不幸地多了。但先兩日祖國的一連串舉動，有鑊的即炒魷，胡總來深圳找人照肺，希望X-ray過董伯伯，佢會醒返少少喇！ 在SARS影響之下，除了科學、醫學方面來和病毒對抗外，還有不少關於風水命理方面，又或者關於神佛方面的抗炎建議，例如請出神明出巡、又或是舞火龍之類。從另一角度看，神能打救的，未必是病毒，但起碼能救人的心，令灰色的人心再燃希望，得到祥和的慰藉。所以，而家市民能做的，就是燃起大家的鬥志，有空去看看這類網頁：http://operateunite.hkcss.org.hk/，睇一下是否能幫上忙吧！就算沒能幫上，聽聽歌仔，燃起自己的鬥志，做足功夫保護自己和家人免受感染，保持健康，就已經是對所有不認識的人好了！多簡單！ 熱熾的陽光和祥和的釋迦大佛還在普照香江的啊！We shall overcome..... |
|
|
刊出日期：2003年4月14日
「為他人著想，一人一口罩」已有近月，大部份的香港人對口罩的抗拒感亦不見了，口罩差不多成為手錶、手提電話、女士的唇膏等必然的隨身行裝的新伙伴。我在網上找了幾個日本方面關於口罩的網頁，大家看看： 1 / 2 / 3 / 4 / 5 / 6 / 7 / 8 在找關於口罩的網頁時，忽然想到自小愛看的特攝片「幪面超人」，於是在網上找找，卒之找到一張感覺很特別的相片。圖右的是V3(三號)，左的是怪人(四號)。我相信很多朋友都會比較喜愛V3吧！但自從帶了口罩後，我反而覺得怪人更令人喜愛，因為他是唯一不帶口罩的幪面超人，突然覺得「笑容，原來很久不見了！」 女友貓骨所工作的醫院，最近改成為接收經診治的非典型肺炎康復中的病人，而她工作的病房亦會於15號起接收該批病人。她亦決定了在接收工作開始後自我隔離，以免令家人受感染。此外，她一個在聯合醫院工作的醫生友人，因為工作的病房發現有受感染的可能，亦變成了有家歸不得，希望盡量減少對家人的感染機會。這種自我隔離的行動，不知要維持多久，貓骨，妳要加油啊！何醫生，你亦要加油啊！ 畢竟，the best is yet to come.... |
|
|
刊出日期：2003年4月1日
而原來只有日本人、台灣人、韓國人等才會習慣在傷風感冒時自動地帶上口罩的習性，香港人差不多在兩三星期內由無到有甚至遍及全城大部份人。改變一個群體的習性是件天大的事，可由此知道香港人對今次事件有多憂心忡忡。 但憂心對身體是沒好處的，要戰勝不知名病毒，還是由那些還在討論某某是否有政治之心的科學家、政治家們去辦好了；但要為個人戰勝病毒，除了注意飲食，保持運動外，就是要從「心」做起！做個開心快活人，病痛都會少d！建議將日劇「悠長假期」的名句「Don't worry, be happy」的大廣告牌放在維港兩旁，以振奮人心。 上圖是日本自由作家原智子小姐email來的相片，地點是東京新宿區四ッ谷近上智大學。圖中人正忙裡偷閒地霸位看櫻花。但為何不是坐在地上的墊而是坐在椅子上？留心看，他們正在攻打四方城啊！正一偷閒中的偷閒，香港人，一起來放輕鬆吧！ 另外，請各位為辛苦和病毒對抗的醫護人員、受感染的病人、受影響的淘大居民們....祝福一下！祝大家身體健康！ nobitaworld.com三週年了，以後也請大家多多關照！ |
|
|
刊出日期：2003年3月26日
香港的非典型肺炎非常利害，懷疑和染病的人數日增，再加上正確消息和流言紛飛，令到人心惶惶，就算身體健康的人，都無形地加上了很重的心理負荷。人的身體不夠健康，可以用藥物又或是多吃有營養的東西來加強身體的機能，但心理是人最難克服的東西。 有網上留言說現在正如歷朝興衰的末年景況，又或是世界末日的景況云云，於是口罩擠提的模樣，人人都趕到藥房買個口罩防身。雖然政府機構公佈的消息不盡可信，但多休息，多吸收均衡的營養，多加注意個人衛生，亦顧及他人感受和公德，有不舒服，或咳或流鼻水，還是記得掩咀和看醫生為上。在此希望大家身體健康，局勢能儘早平伏就是了！ 香港人，現在要改向前看，不要只記向錢看囉！健康為上呀老友！ |
|
|
刊出日期：2003年3月12日
接住做的一齣叫「輕輕緊握你的手」，武田真治和菅野美穗組合，故仔簡單，講述菅野係聾啞人士，她的結婚生女加埋個女成長的重重困難經歷。但原來只得五集，仲原來當年係每年大約在年底時播出一集，足足五集播了五年，所以人物的造型集集都有多少唔同(當年日本播時分年睇或者唔覺)。但勝在人物關係簡單，兩對主角父母、兩個主角、一個女(前後用了三人)、一個女同事、一個男同事和另一聾啞靚女結婚同生出的正常BB。好耐未睇過故事比較簡單的日劇，幾輕鬆，所以推介一看。另外，主題曲不約而同又係英文歌，但名就唔記得囉！ 做完電視評論員，講返d大家留意的事先，而家三月中，梗係準備睇櫻花喇！就黎去旅行的，記得緊追櫻花情報呀！但如果呢排去又就唔到睇櫻花，唔使失望，呢期仲有草莓(即係士多啤梨)當造，仲有之前二月梅當造後大量的梅製品推出，而家去到日本包食共玩不停！ |
|
 刊出日期：2003年3月2日
二月咁又過左，真係歲月不留人。二月一整月，先忙了過農曆年的事，到了下半月工作又忙起來。這些忙包括工作量上的忙、應付同事間的不和的忙、應付某無良老細辦事為屈水的忙.... 工作量多不休提，全香港不知有多少人如是，但講到就黎要加稅，仲有工作人口和非工作人口的比例上，將會出現非工作人口仲多過工作人口，唉~~難為做咁辛苦搵個錢，但交咁多稅，究竟養左d咩人架？ 應付同事，出於有人被恰，而受害人又係我介紹來的，我梗要出手。有時真係唔明白，有人幾十歲人又唔係有料過人，仲要玩恰人、爭野做、搵人老襯、比說話人地聽、無故滋擾、成日襯人唔係度或未返到裝人枱面有咩做.....仲有工作經驗、能力和年資與表現成反比，唔係經濟唔好費事累人無工做，我一定見義勇為稟佢一大鑊！ 至於果個老細，夢幻組合又即將出擊，多事之春又來了！有關的同事請自求多福！ 數完一輪，講返開心少少。星期六，一早要出去做野，返到公司仲係早，一於忙裡偷閒，買杯咖啡同麵包返公司食，順道換張三月的wallpaper，算係happy saturday啦！ |
|
|
刊出日期：2003年2月4日
雖則經濟唔好，但都好高興知道不少網友都仍有外遊的計劃。因為只管工作，唔去休息下，真係會人都癲架！ 網頁的瀏覽人數即將到達200,000人次，但因為遷就時間，原定即將舉行的第七次聚會將會順延至三月才舉行。至於確實日期和地點，當然請大家繼續留意一下公佈喇！ 而網頁內容因事忙而無更新，但各位請留意，事先張揚的N某的北海道關西遊記，快將推出！另外，首頁將會進行小改版，並會加強推廣各網友的個人網上商業活動。如果你有網頁，又有利用網頁做緊d正經合法小生意的，歡迎來個電郵相談交換banner的計劃。 |
|
 刊出日期：2003年1月23日
上次大雄的話寫時，仲有一日先完左2002年，點知今次再寫，咁就過左23日，時間過得真快。最近網友們都頗忙，從睇睇大家在網頁上寫的日記、週記、版頭的文章等就了解清楚。卒之經過一輪網上，又或者見面時互相鞭策，卒之大家都趕返係馬年將盡前更新一下。 近日在中環食飯，在食肆所見，食客越來越少，由點半先搵到位到最後點四都好多位，仲有時無人到任坐果隻添！交稅日子已到，但雙糧都仲未出，與網友見面，傳來又係「唉~~減左x%人工呀！今年去唔到日本旅行喇！」行過彌敦道，吉舖越來越多，香港，究竟仲有無得救呢？ 講到咁遠，香港有無得救都係留返比董伯伯去想，但近在公司，又要唉~~話說2003年第一個工作天，已經被無料的老細吩咐趕野，從此無寧日，日日新鮮唔得佢死。最後仲有人靠向祖國，更上一層樓，真無天理，無料o既就上到位o既？講開講埋佢老友，最近做左特區某級法院的暫委法官，又係無料到，仲撞到有單野對著佢比佢無厘頭地押後幾個月先審，得啖笑！仲有，公司有人以最少的工作能力謀取最大利潤，雖則佢家家有本難諗的經，但願這個世界無咁多「萬一」，萬一出左事，再培訓局都唔知肯唔肯收佢？唉~~多事之冬，都係隔星期同班網友去行下山，影下靚相好過，經濟實惠有益身心.... |
|
100日，如果比100日你，你會打算點樣用佢呢？早前香港就過了100日的疲埠日子，要搶購口罩，有流言叫你去搶購食物，要人人自危，要阿爺接濟，要有人負責任又偏偏咩野都唔使佢負...
咁究竟今日活在香港，慶幸除了口罩不再做疫民之後，在沒有口罩的日子呼吸的應該是新鮮空氣？還仍是嘆氣呢？
呢輪成日落雨，仲係落親都唔細，又黃雨果款添，真係幾悶人。
近月工作很忙，在這些日子，說「忙」是好事，但缺乏休息，工作時又有點勞氣，確是幾辛苦下架！
依然是非典的日子，加上天氣越來越熱，帶上口罩的確是很難捱的日子。
四天的復活節假期對於香港來說，除了被政府定了個時間做全民清潔，給高官做做show外，就是大部份香港人從前很少做的事，就是多多認識香港。
在中東的美伊戰爭已經有20多日，但戰果已接近肯定的局面；而在香港的非典型肺炎戰爭，仍是沒完沒了，確令香港人感嘆。
香港發現非典型肺炎個案已不知過了多少日，每日在耳邊的只有中招數字又增加多幾多十人，相對於出院數字約佔中招數字只有約十分之一，實在沒甚令陰霾重重的香港有個鬆一口氣的大好消息。
剛過去的星期日，舉行了一次本來想公開的網聚，可惜未公佈已有佔了名額大半數的網友得悉而報定名，最後唯有改為私下邀請方式進行。參加人數約40人，參與晚餐和重頭節目問答比賽的更有接近30人。今次贊助的獎品和帶來抽選交換的禮物都非常多。可惜聚會後公司工作非常忙，聚會花絮遲一下才能完成給大家看。
今年頭一連睇左兩齣有線電視在星期日晚播出的日劇，第一齣係
「一元復始，又要返工」，踏入羊年，相信不少網友嘆完幾日假期又要返工。雖則一班大師話初四不吉，責任局長又求到個諸事不吉的下籤，但唔通邪就唔返工？今時今日咁o既工作態度就係有野就做，多做是福，不求薪優只求糧準。