大雄的話

最新的大雄的話

家種鈴蘭

罐頭裝的鈴蘭,從北海道來到香港,已生長了19天。四個幼芽,長出了兩枝花串和葉兒,餘下兩枝有綠葉。

由第一朵小花綻開起計,也有一星期了,一路從低開到頂端,很最後一串差不多大小的花,就是一串鈴蘭了。照現況,花兒應該還可以維持最美的狀態多幾天,往後,希望能一直保存下葉和根,一直培植到來年再開花就好了!

除了鈴蘭,同場加映薰衣草。這是從富田農場買回來的種子套裝。現在已經有五六個種子發了芽,似乎還有一點反應慢的種子陸續跑出泥土來呢!期望七月時能趕及看薰衣華的盛開呢!

網友venus的結婚用絲花網店已開長了,生意亦不錯,今年是好年,那位俊男美女今年結婚,不妨考慮一下用絲花,大熱天,鮮花很難保存得耐,絲花的確是一個好選擇呢!

大雄
2004年6月25

蜜月旅行回港已有9天,返工也返了8天,一切又回復從前 - 忙!唯一分別,或許是回家的路不同,因為已正式入住新居,還有要習慣搶被蓋...

今次蜜月旅行的遊記,當然會弄出來給大家看,不過,就要先讓我先清理一下凌亂的新居。雖說結婚前已預留了很多時間攪攪新居,可是從舊居搬東西到新居的工作一直難於完成,現在很多舊東西還在舊居中,而新居就到處放滿從舊居拿過來的寶物。

最近,友人間有很多新攪作,灣岸製作的何老闆,新書新計劃頻頻出籠;屎撈媽新設網上商店,專營絲花租售;友網ec2japan新攪作新安排陸續出場,我想我也要抽空弄點東西出來湊個熱鬧吧!

說了一大遍,回歸今趟大雄的話的標題先。鈴蘭,即是suzuran,一種小白花,像個鈴的模樣,正是北海道六月之花。上面大圖是攝於札幌市舊都廳外的盛開中的鈴蘭,左下是5月29及30日兩天運行的SL鈴蘭號,行走於深川至增毛,因為某原因,今次北海道之旅兩個日子都有坐它,還拍了很多照片;此外,右下是秘密進行中的鈴蘭培育計劃,今天計劃已踏入第9天,詳情嗎?多多留意這裡吧!

大雄
2004年6月15

Kumababa生日

今天已經是蜜月之旅的第13天,還有兩天就要完結旅程,回港繼續捱世界了。

這一趟是我第二次到北海道,上一次是五年前一個人去到日本,然後再想去那裡,於是拿著剛從書店買的rurubu就起行了。今次依舊是拿著本rurubu(今次多了本jalan),去的地方雖不比上次多,但部份地方還是第一次去。行程中,除了首三天是機票package固定了酒店,加上擺酒後倦到九彩,於是差不多是訓半天,玩半天。只是在札幌內走走。餘下的行程都是邊玩邊plan。

北海道的天氣已熱了起來,從6月1日起已算是入了夏季,酒店也都開始了收取季節料金。不過,13天中,有幾天還是下了雨,尤其是期望已久的利尻島及禮文島的旅程,還有美瑛的旅程都是在天雨下渡過,確有點可惜。

過去的兩天都是深山峠的kumasan loghouse住,感覺不錯。第1晚同宿的有已經住上第2天從香港來的關先生和馬小姐,還有一位日本客人;第2晚就有香港來剛考完試的四位中大準畢業生。而最巧合的是大家都今晚會/已經回到札幌,都會住在札幌站北口的東橫Inn,即是今晚最少有8個香港人住在這一間東橫,真巧合。

早臨別kumasan loghouse時和他一家合照,原來今天是kumababa的76歲生日,臨別匆匆,唯有從袋中拿出一包利尻島參加觀巴士送的名產利尻昆布作為生日禮物,因為袋中除了污糟衫,沒有甚麼好東西在身。

kumasan的地方感覺不錯,尤其早晚餐由kumamama煮的東西,味道很不錯呢!有機會會再來一次,當然會選在花季或是冬季再來喇!

p.s. vicky & sam,我搵到妳地張相呀!

 迷上「來自北國」的大雄
2004年6月4日(寫在札幌)

結婚了!

對不起,各位靚女,我結婚了,令各位傷心失落的話,請鼓起恨嫁的心去找個能給妳幸福的對象吧!

哈~~ 如果真係有以上所講的靚女,真係唔好意思喇,妳早幾年同我表白,咁今日就可能唔同左囉!

漫畫中的大雄本來是與技蘭結婚,卒之潦倒一生;好在命運最終改變了,最後能與靜宜結婚。記得那故事是說過去的大雄,知道未來是要和技安個妹結婚,最終成群子女,貧賤夫妻,潦倒一生。於是乘時光機到未來,在雪山上本來打算去救出遇險的靜宜,可惜身子弱的大雄(過去和未來)卒之都是由靜宜救出脫險。靜宜有感於不照顧大雄的話是不能的,於是答應和大雄結婚,然後生了小雄,快快樂樂的過日子。記憶中的故事就是這樣了。

回到現實中,籌備了接近一整年,很多瑣碎事要處理,卒之捱到今天了。希望今晚賓客們都開心而回,老人家滿意,後生又無悶親,咁就好囉!

婚後的兩星期會到北海道渡蜜月,但一切都未安排好,一於去到再算。網頁方面,如果可以的話,邊玩邊弄個遊記給大家看吧!

p.s. 手信就hand free (免提~~哈!)有力有心情就買返黎喇,今次係蜜月,要玩得輕鬆、食得暢快、住得豪華、買得起勁......

大雄
2004年5月21日

黑名單

話說早兩天公司勁多野做,於是連午飯時間都在趕工。晚上勁肚餓,八點左右去了旺角女人街近家樂商埸一間出名焗飯同粉的餐廳晚飯醫肚。

廳新裝修,差點過門不入,但新裝的餐廳內部很空洞,於是人多食飯嘈到傾唔到計。坐低叫了杯凍咖啡和紅酒汁牛仔肉闊條麵。點知杯野一黎就眼睇都唔對路,奶水咁色。淺嚐一口,大大聲表達不滿,因剛好是在櫃位旁,侍應很快就說跟我換一杯。點知返黎一杯經檢查相信都係頭先我淺嚐過的飲管仲在,再試一口,xyz佢,又係奶水咁!卒之全程放係度無飲。

條麵到,點知又係一口,就係一口,就發現碟野不夠熱(唔係唔熟)。於是一試,將焗出來的碟一手拎起放係另一手的掌心,登時覺得油剛師傅都唔係我果皮!有邊個夠膽將熱燙的焗品碟子放到手上呢?我就係夠膽那個,真係火都黎埋!飛快食完就走!連佢專登找散的零錢,都一個不留拿回自己荷包!肚餓時食得唔好,真係慘無人道!

早前亦有去過後兩條街對面係公廁球場的食扒餐廳,一次要求七成熟的西冷,卒之來了片七成生的,仲要有好多筋。最後咬過再吐出來的,和落了落肚,應該是五五波收了場。過了一陣子,再給一次機會,點知今次叫雜扒,卒之塊牛塊係完全食唔到,生之餘又成塊筋,點食呀!

大雄
2004年5月15日

大 雄的時光機

最近不斷將家中寶物搬到新居,偶有發現被遺棄多年的東西再次出土。雖不及旺角發現的那幾個晉代古物,但大雄的寶物隨時都抵得住其中果一個半個晉代古物的身價呢!

所謂此刻無價,重拾舊物,第一,當然不是它的價值,無論當日,又或是今日,最值的是那一份回憶。

大雄的時光機雄的時光機再次登場,由往日的大雄的閒人世界,來到nobitaworld.com,將會不時更新,如果你都有好野,不妨大家交流一下。

大雄
2004年5月9日

大合

終於袋中的炸雞代用券升到240元大關,亦代表供左五期會的叮噹大合奏終於供斷,可以黎個大合奏喇!

近日正準備月底的北海道之旅,行程15天,希望去得輕鬆,途中同返黎都唔會比人哦,所以呢,邊位兄弟姊姐有咩好料,請報黎聽一下!不過,手信就免提,唔係拎到仔仔下,又出事點算?

最近都沒甚特別,今期"短說"住先!

大雄
2004年5月2日

四重奏

擦仔黎喇!只差一隻叮噹,開心大舞台大開show就可以進行了!但累積左幾百蚊的餐券,遲下就有排唔憂無野食。

這幾天熱得不得了!30度!4月咋喎!使唔使咁熱呀?家下龍舟都未趴架喎,已經熱得穿短袖衫都覺得熱,遲下點算好?

本週大致上都幾多野做,最特別係呢個網上大家庭又有網友大個仔起返間屋,就係travelpooh係牛一當日造就左佢個網上家園,雖則佢好多時都係處於虛無飄渺,但呢個家就實實在在,得閒去踩下場囉喎!

其他事呢?都可以算係"無事終了"。正期待下星期的long weekend喇!

大雄
2004年4月25日

三重奏

上一回講公司個資深從業員,卒之又火都黎埋寫得長篇大論,比幾位朋友詐形寫得太長,今次寫返短d喇!

又一星期喇,今期技安都出埋場,而且色士風音樂好正添!可惜,當三重奏時,有一段技安接上的,唔知點解有一個音突左,唔通係要符合人物性格,係唔o岩音先似佢?

好友何老闆最近參與投資了本玩具月刊,咁nobitaworld.com梗係全力支持喇!何老闆加油!英男加油!本書要爭氣呀!

此外,今日係舊同事"安娜"的大喜日子,在此祝一對新人百年好合,永結同心。話說天氣預告話今日會行雷閃電落大雨,但今日竟然陽光普照,仲係去到好好太陽果隻,如此吉兆,恭喜、恭喜!


2004418

二重奏

食炸雞換公仔已經去到第二個星期,大雄同靜宜終於可以相聚喇!原來兩個公仔連接上就會有同步的二重奏,真係抵佢呢鑊野賺我幾百蚊。

今期講下公司個資深從業員,佢年資極深,但能力呢...不提也吧!最近有在別間公司工作的舊同事在電話中訴說她公司的同事又何其辦事不力,做左幾年都仲要打返公司問這問那仲係白痴問題先做到少少野,我公司果個咪重極品,係佢同事幾倍的年資,能力都不相上下添!

近日阿頭放大假歐遊,我一人身兼兩職半,一份係自己,一份係阿頭,仲有半份,咪係資深從業員果份囉!點半份法?近年但凡要出街的文件,影印釘裝我全部做好先放係佢果度,佢做好出街就得,果d文件送完去法庭後仲要送埋去對手的律師行,例如上一段提到的舊同事,有一單野係同佢公司做對手,當文件送到法庭後,一份要送到對手的公司,一個正常的從業員會一日內完成,反正去完法庭回公司,都要先經過舊同事的公司,而且後兩者的步程都不足五分鐘,但資深從業要隔了一個工作天才能完成。

又例如資深從業員和另一個同事每月會輪換負責的法庭,有老闆寧願在月底前的三兩天有五張告票入稟,都選擇放下多幾天,待輪換後由另一同事去辦,因為資深從業員若然要一時間出五張告票仲要佢派送埋,無五至十日都做唔哂,仲要係試哂親身去派幾次都做唔到返黎要用寄的方式,中間開埋d車錢仲狼過咩,試過中環去青衣機鐵上蓋,開80蚊車錢,真係坐機鐵先得(唔係東涌線喎),落筲箕灣又80(唔係坐的士,係都唔夠來回喇!)又試過去深井去左八次都係做唔到,卒之返黎攪到時間少左幾日要趕住寄出去,今次係90x8。講返轉頭,五張告票,另一同事由入稟到派哂(去好多個地方的),三日內做好哂!

仲有,如果去收樓,都係返到公司晒埋相片,寫埋個一頁剔剔下的report仔比個客就可以即日交貨,但資深從業員嗎?經過多次統計,五個工作天;再加埋收樓要貼通知書,地址會打中文,兩行仔o者,佢電腦化咁多年都唔識打,去屈隔離左右d秘書幫佢打,利害,利害,佩服,佩服.......我已建議果兩位受屈的秘書下次唔好幫佢,係幫咩,寫個速成輸入法係個地址上,叫佢自己打,整慣哂真係唔係路,佢起碼仲有十幾年先到退休年齡,進步些少學埋打中文都唔過份o者!對得佢多真係火都黎埋!

復活節雖則大家假期多比較得閒可以睇長d的大雄"勞騷"的話,但為左大家開心的假期,今期暫時寫咁多先喇!復活節快樂喇各位!~~

大雄
2004410

忙了!忘了!

上月,已經是上月了。因為新的網存公司轉戶手續快得失去預算,所以39nobitaworld.com突然要搬去新的家。大雄的話與及大多數內容都來不及計劃,所以只匆匆上傳一些東西上網,以免大家以為我著左草。而大雄的話亦只草草寫了幾句,事隔大半月終於再次有空係度發下勞騷,又要黎悶下大家喇!

專登申請了個有mysql支援的網存計劃,所以拿拿林設好了一個討論區比各位鄉親父老叔伯兄弟多個地方吹吹水、收下料。呢度唔使係最旺的討論區,只要大家歡喜就是了!

而一向以分享遊記為宗旨的遊記篇,因為要重整內容,現先將幾個老友的精彩遊記連結優先重新整理,所以未到你唔好緊張,唔好以為我嬲左你,整緊架喇!

這幾星期,公司的上司放大假歐遊去了,於是做餐死,正如一個人去食二人前,仲黎個蟹合戰咁,做到炒罵拆蟹咁o既樣!呢幾日仲覺得多左好多蚊係眼前飛,死得喇,死得喇!好似今日返到工麵包都未食完就又做呢樣果樣,卒之直落到八點半收工(期間都係食下餅仔頂住)。咁好彩肯德基有正野換,拉小提琴的大雄,於是九點幾黎個3號同6號餐,呢次一人食二人前就食哂兼無拆蟹,肚餓嘛!

最後,原來41日係nobitaworld.com成立4週年,我忙到忘記了,老人痴呆,點算?!唯有係度祝大家清明及復活節快樂,趁假期日遊果幾位,有錢剩就唔該買份手信返黎同我慶祝下喇!

大雄
200443


大雄的日本世界已經搬到新的家了!(新的網頁寄存公司)

全新的頁面資料、討論區等將陸續送上,請耐心等候!

大雄
200439

刊出日期:2004227

哈哈!懶到出汁,而家先寫04年的第二次大雄的話!(不過都寫得密過隔離舖頭果個瑪姬架喇!) 卒之有同事、朋友都問過,「喂!幾時update個網o者?」

老老實實,家下真係忙到出汁,無咩時間整野,加上呢期公司又趕野,加上係果個最高學歷的老細,真係命都無埋(與佢學歷無關,係佢辦事能力和方式有問題o者!)。家下我可能成為傷殘人士,事關先幾日趕文件要蓋number,用部number機卒之蓋左3千幾個number,換轉係打羽毛球,一晚抽擊3千幾下,國家隊都入得添喇!家下右手些少痺痺痛,各位睇開大雄的話的同事,呢期唔該唔好逼迫我做野,等我休息下都好!

講返網頁,叫我update就真係要搵日,又好在有一班網友,今日有日本簽證資料更新(鳴謝:鳳爪),又有網站Dummyhome連結(非常有趣的一個網站呢!)

至於先兩星期大家係當眼地方睇到飛驒高山sarubobo發售。呢次係我同萊遊日本網主Roy的試作銷售,o拿,來自飛驒高山的緣寶寶,唔係四圍買得到,除非你去高山買,唔係就要黎呢度,買唔到就你走寶喇喂!(好順口喎!)

仲有,踏入三月,又差不多係webhosting service到期,呢一年用的那個down左幾次,不大中用,所以正密謀轉第二間,所以黎緊可能有短時間會對網站登入有問題,大家有時間請先bookmarkd連結同日遊經驗募集所喇!另外,2003年的網站融合大計隨04年到埋兼三月都黎緊,而家決定取消呢個計劃,但就打算轉webhosting service的同時將網頁一切從頭開始,但會保留友站、遊記等連結,其他資料內容和一些網上商業/商店的連結,將會終止。如有關網主想繼續連結,請email給我。

刊出日期:2004118

04年過左10幾日,又就快到農曆新年添!呢幾個月股匯樓齊升,似乎沉左幾年的香港人又滿有希望喇!

近日依然係忙,但好在已經習慣了""對打工仔係好事。但因為大家都忙,攪到今年仲未有同一班網友去行山。

至於起碼半年一度的大聚會,唔知有無時間計劃下呢?要攪,你又黎唔黎?你又幫唔幫手先?

經營兩年的和風商店,入貨一次就再無新貨。但即將有新貨"入荷",所以和風商店將盤點唔知幾多天,希望有時間盡快將新貨推出比大家選購!

猴年將至,nobitaworld.com仝人謹祝各位網友家肥屋潤、富貴迫人、身壯力健,仲有梗係年年日遊無數次,下下購物多籮籮,餐餐玩到忘哂形,總之盡興而回喇!恭喜發財!~~

返回大雄的日本世界首頁